मी शोधतो आहे...
बा भीमा, तू सांगितले म्हणून शिकलो आम्ही
तेही अर्धवट-
शंभर शकलं आणि त्या-त्या पुढार्‍यांनी केले आम्हा असंघटित,
आणि संघर्षाचं म्हणाल तर लढतो आम्ही फक्त भावाभावात अन् गावागावात
इथल्याच मातीतला पण लुप्त झालेला बुद्ध त्याचा धम्म तूच दावलास आम्हा जरी
अरे तो बुद्ध दूरच इसवीसन पूर्वीचा पण आम्ही कुठे समजू शकलो तुला तरी
स्वातंत्र्य समता बंधुत्वाची आगळीवेगळी लोकशाही तुझी
खरच नांदतेय का इथे ?
पोलिसांपासून बरीचशी खाती भरतायत आपापले खिसे
चोराला सोडून संन्यासाचा बळी अन् वजनी हातानुरुप न्यायाची खेळी
तुला अभिप्रेत असलेला समाज मी शोधतो आहे माझ्याच बांधवांत
अरे तू दिलेल्या बावीस प्रतिज्ञा तुझ्याच अनुयायांनी गुंडाळाव्यात?
प्रकांड पंडितांचा रोष पत्करून तू केलेस देव-देवतांचे मूर्तिभंजन
पण आजही देव्हारे दिसतायेत तुझ्याच अनुयायांच्या घरात
कुठे गेले तू घातलेले अंधश्रद्धेचे अंजन?
मोठ्या दिमाखात साजरी करतो आम्ही बुद्धासह तुझी जयंती
मिरवणुका डीजे ढोलताशासंगे त्यात हिडीस कृत्य व मर्कटलीला त्या तळीरामांची
प्रत्येकजण समजू लागलाय स्वतःला आंबेडकर वाचून दोन चार पुस्तकं
पण खरच प्रगल्भ झालीत का हो यांची सुस्तावलेली मस्तकं?
मूलनिवास्यांचा खरा शत्रू हेरून तू नायनाट केलास त्या मनूच्या स्मृतीचा
पण आज गुप्तपणे पुन्हा उभी होऊ पाहतेय ती लक्ष आहे का तुझ्या अनुयायांचा?
तुझ्या शिकवणींचे आचरण आज करतायत कुणबी भंडारी या इतर जाती
आणि तुझे अनुयायी..? अरे तुझे अनुयायी तर आपापसात लढून खातात माती
झालेत नाममात्र कवी आज चळवळीतले एकेकाळचे वाघ कार्याचा विसर पडल्यावर कोण करणार नाही टिंगळ, टवाळ्या आणि विडंबन-
तरीही केंद्रात जाऊन बसलेल्याला कसा येत नाही राग?
शंभर वर्षांपूर्वी आरक्षणाविना तू झालास डॉक्टर
पण आम्ही सत्तर वर्षे होऊनही नाही होता येत साधे पदवीधर
तथागत बुद्धासह तुलाही मागे खेचायला इथे हितशत्रू आहेत का कमी?
पण खरं जास्त वेगाने मागे आणताहेत तुझेच महाभाग अनुयायी.
बा भिमा आयुष्यभर भोगल्यास तू अन्यायाच्या मरणयातना
पण याच अन्यायकर्त्यांसकट उद्धार केलास तू साऱ्यांचा त्या संविधानाने
तरी आजही तुला फक्त दलितांचा नेता म्हणून पाहतो सारा दलितेतर समाज
तुझा त्याग तुझे समतेचे कार्य बंधुत्वाची कणव आणि न्यायप्रधान विवेक आजही नाही कळला त्या विवेकांना
तरीही मी शोधतो आहे माझ्या धम्मबांधवांत तुझा तो क्रांतिकारी लढा झुंझार..!
तरीही मी शोधतो आहे माझ्या धम्मबांधवांत बुद्धधम्माचा संघाचा संचार.!!
- जितेंद्रकांत
(१४ एप्रिल २०२०)
कोणत्याही टिप्पण्‍या नाहीत:
टिप्पणी पोस्ट करा